ازاي تنجح في علاقاتك العاطفية + ليه العلاقات بتفشل ! نتائج مبهرة حصرياً

ازاي تنجح في علاقاتك العاطفية + ليه العلاقات بتفشل ! نتائج مبهرة حصرياً ، العلاقات العاطفية جزء رئيسي من حياة معظم الناس. لتحظى بعلاقة سعيدة ،يجب أن تكون على استعداد لتقديم أكبر قدر ممكن من العطاء. من المهم أيضًا أن يحترم كلا الشريكين بعضهما البعض ويتواصلان بصراحة وصدق مع بعضهما البعض.

لكل شخص تعريف مختلف لماهية العلاقة الناجحة. يمكن أن تعني العلاقة الناجحة أشياء كثيرة لكثير من الناس. في هذه المقالة ،ستتعرف على كيفية تحديد معنى النجاح بالنسبة لك ولشريكك. ستتعلم أيضًا كيفية التأكد من تلبية احتياجاتك العاطفية في علاقتك.

أخيرًا ،ستتعرف على سبب فشل العلاقات والخطوات التي يمكنك اتخاذها لمنعها من الفشل. العلاقات العاطفية هي أهم علاقة في حياتك. إذا كانت لديك علاقة جيدة مع نفسك ،فستتمكن من الحفاظ على علاقات جيدة مع الآخرين.

كيفية النجاح في العلاقات العاطفية وكمان ليه العلاقات بتفشل.

على فكرة يا جماعة انا عايزكم تطولوا بالكم معايا وتكملوا المقال للآخر لأن مهم جدا نستوعب كل كلمة هقولها دلوقتي قبل ما نتعمق في المقال . يا فرحتي بيك لو عرفت تلفت انتباه الشخص اللي انت او انتي عايزين تكسبوه بس ما عرفتوش تحافظوا عليه فرحتي بيك لو انت جبت جون بس الحكم رجع للفار وحسب الجون ده اوفسايد.

ازاي تنجح في علاقاتك العاطفية 

النهارده هنركز علي سبب واحد فيهم والسبب ده هو : الانبهار الزائد للشخص اللي انت مشدود ليه.

الكلام موجه للولاد وللبنات وانا كالعادة جايب لكم معايا امثلة من المواقف اللي بتقابلنا في الحياة كل يوم علشان نشوف ازاي نقدر نطبق الكلام ده في حياتنا الشخصية. علشان نفهم الكلام ده خلونا نقسم او نفسر مراحل العلاقات العاطفية.

المرحلة الاولى : هي مرحلة الانجذاب.

الانجذاب بيكون مرحلة جديدة بالنسبة للراجل وبالنسبة للست. تجربة حلوة كده وجميلة بتحسسك ان الجو مكهرب وكأن قلبك بيضخ الحياة. يعني بتبقى حاسس ان الحياة بقى لونها بنبي وانا جنبك وانت جنبي وجو المحن ده.

بالنسبة للراجل في مرحلة الانجذاب.

الراجل بيكون عايش حياة رتيبة وروتينية لدرجة ان هو اللي بيبات فيه بيصبح فيه يا بيقعد مع نفس اصحابه على القهوة يا مفعول اربعة وعشرين ساعة في الشغل يا اما بيكون شخص مش اجتماعي فبيقضي معظم وقته لوحده في البيت.

وفجأة لما الظروف تجمعه بواحدة زي القمر تهز اركانه وتدلدل وجوده هي بالنسبة له بتكون مركز الكون زيها زي المغناطيس اللي انه يقرب منها. هو معها بيحس ان الدنيا ابتدت تضحك له. وكأن في حاجة نفضت التراب من على قلبه. وكأن البنت دي بتوعه بحياة جديدة مليئة بالطاقة الايجابية والسعادة.

هو الراجل مش بيكون عارف هو منجذب لها ليه ? ما فيش سبب معين. كل اللي هو عارفه ان هو بيكون مبسوط جدا في عنان السماء وهو معها نفسه الحظ يكون حليفه علشان يوصل لقلبها باي شكل من الاشكال. بيبقى نفسه يشوفها تاني ويقرب منها والاثارة دي بتسيطر عليه تماما. ده بالنسبة للراجل.

بالنسبة للبنت بقى في مرحلة الانجذاب.

الحقيقة هي ان البنت يعني مظلومة جدا في المجتمع ده. سبحان الله وهي في المدرسة او لسة صغيرة لو اتكلمت مع اي ولد تلاقي مكتفاها وابوها واخوها بيكملوا عليها وبيشنقوها بأيدييهم الاتنين. وسبحان الله لما تكبر شوية او تدخل الجامعة تلاقي اهلها فجأة كده تحولوا.

هيقولوا لها حاجات زي دي. مش هنفرح بك بقى? نفسي يا بنتي اشيل عيالك. ما فيش حد كده ولا كده? حاجة تجنن وتضحك المجتمع ده والله العظيم. المهم ان البنات مش عايزين جوازة صالونات. هم بيكونوا يعيشوا قصة الحب الجميلة اللي احنا بنشوفها في الافلام ومش بيكونوا عايزين القصة دي تتحرق.

البنات عايزين يرتبطوا بواحد هم بيحبوه مش واحد مفروض عليهم. فلما الظروف تتحالف معهم ويتعرفوا على فارس احلامهم اللي على حصان ابيض واللي ماسك سيف بيبرق في ايديه برضو بيحسوا ان الدنيا بنبي في بنبي. وان الجو مكهرب وان ما فيش احلى من كده ده حصان اسود انا ما ليش دعوة.

لذلك مرحلة الانجزاب هي المرحلة اللي فيها اتنين بيتعرفوا على بعض ويحسوا ان هم مشدودين لبعض وان الجو مكهرب وان الاثارة مالية الدنيا وان ما فيش احلى من كده. هم الاتنين بيعملوا نفسهم عبط بس الحقيقة هي ان الاتنين كل واحد فيهم بيبقى هيموت على التاني. طب الجو المكهرب ده? ايه اللي بيغيره? يخلي اتنين كانوا هيموتوا على بعض بعد زمن ينهوا علاقتهم ببعض وكأن شيئا لم يكن. هو ده اللي احنا هنفهمه دلوقتي في المرحلة اللي جاية.

مرحلة ما بعد الانجذاب بالنسبة للراجل .

• انت لما بتعجبك واحدة بنت. بتعمل ايه ? بتسيب اللي وراك واللي قدامك لو قدامك فرصة تشوفها خمس دقايق بس او انك حتى تسمع صوتها في التليفون.

• الشغل اللي انت علطول مطبق فيه هتبتدي تمشي منه بدري شوية علشان تروح تشوفها. وده طبعا مع العلم ان سحلة الشغل جزء من شخصيتك.

• صحابك اللي على القهوة مش هيشوفوا وشك تاني.
• ومن هنا ييجي المثل بتاع ان جات الست يغور الميت راجل. مش كده ولا ايه ?

• ركزوا بقى في اللي هقوله دلوقتي.

• انت لو حسيت ان فيه احتمال قد كده ان هي كمان تكون معجبة بيك هتسيب اللي وراك واللي قدامك علشان تروح تشوفها وهتعمل المستحيل علشان تبهرها. ومش بس كده.

• ده انت هتبالغ في صفاتك الحلوة علشان تبهرها اكتر واكتر ومش بس كده.

• ركز في الحتة اللي جاية دي لان هي دي التيتة.

ازاي تنجح في علاقاتك العاطفية 

ده انت كمان هتداري تماما عن اي صفة سلبية ممكن تقفلها منك حتى وان كانت الصفة السلبية دي جزء اساسي من شخصيتك.

• يعني لو كانت هيه شخصية اجتماعية وعندها اصحاب كتير جدا بنات وولاد انت اكيد مش من اولها كده هتروح تقول لها لا يا حبيبتي ما فيش حاجة اسمها هيبقى عندك صحاب ولاد . ما تستهبلش. انت بتيجي على نفسك علشان تحسسها ان انت الروش بحيس ان هي تعجب بك. وبتقول لنفسك ايه ? هبقى اربيها على ايدي بعدين.

• لو هي مثلا وانتم لسه بداية العلاقة قالت لك ان هي رايحة تبات عند واحدة صاحبتها انت ممكن تغيير عليها جدا خصوصا لو صاحبتها دي كان عندها اخ ولد. بس برضو ما تستعبطش. انت مش هتفتح بقك علشان ما تحسسهاش ان انت داخل حياتها تتحكم فيها. هتفضل ساكت علشان تحسسها ان انت الشخص اللي فاهمها. والشخص اللي ما فيش زيه. بحيس انها هتنبهر بك يعني.

• لو هي بتشتغل فبتنزل الشارع وعلى طول بتقابل ناس جديدة دي حاجة ممكن تخليك تغيير عليها بس برضو مش هتقول اي حاجة علشان ما تديهاش انطباع ان انت جاي على حريتها وان انت ناوي تحبسها في قفص . برضو بتقول لنفسك ايه? واحدة واحدة كده هبقى اربيها على ايدي وقدام شوية هخليها تتغير.

فلما انت تكتم على عيوبك وما تظهرهاش غير خمسين المية بس من شخصيتك اللي هو الخمسين في المية الايجابي هي فعلا هتنبهر بيك ومش هتصدق ان انت موجود في الوجود اساسا هتحس ان انت فاهمها قوي فهتبتدي تتعلق بك.

بس اللي انت مش واخد بالك منه خالص هو ان انت ما عرفتهاش غير على خمسين في المية من شخصيتك بس. يعني معرفتهاش غير على نصك. مش بتبقى واخد بالك ان انت معرفتهاش على نصفك التاني خالص. الخمسين في المية الوحشة يعني . فاللي بيحصل هو ان هي بتبتدي تتعلق بالنص اللي انت اظهرته وبتفترض ان النص ده هو انت. ده الشق اللي يخص الراجل.

مرحلة ما بعد الانجذاب بالنسبة للبنت .

انتي في الاول برضو ممكن تبالغي في صفاتك الحلوة علشان تبهريه وعلشان ترضيه وعلشان تخليه ينجذب ويتعلق بيكي.

• يعني مثلا لو انتي شخصية اجتماعية ممكن يكون عندك اصحاب كتير وتكوني متعودة تنزلي معهم يوم الخميس. بس يوم الخميس اللي جاي بتقولي له انا هنزل معك انت. مش هنزل مع اصحابي علشان تحسسيه ان هو ليه الاولوية.

• ممكن برضو في الاول لما يجي لك رسايل او مكالمات معاكسة هتقولي ليه على اساس يعني الحساسيه برجولته. وتأكدي له ان انتي عاملة ليه اعتبار .

• كمان لما تيجي نازلة مع واحدة صاحبتك او خارجة معها تتغدوا في حتة او رايحين في المول تلفوا شوية او نازلة تعمل لي اي حاجة بتحكي له عن يومك عشان تحسسيه ان هو جزء منه.

وفوق الصفات الحلوة اللي انتي بتبالغي فيها برضه بتكتمي عن اي صفة من صفاتك السلبية علشان هو ما يتقفلش منك. بتغلطي نفس الغلطة اللي هو غلطها.

• يعني ممكن في الاول تكوني انتي بتغيري من السكرتيرة بتاعته او من زميلته في المكتب اللي زي القمر. بس انتي في الاول مش هتقولي له ده علشان ما تحسسيهوش ان انتي مدلوقة عليه.

• ممكن برضو تكوني انتي بتنامي بدري جدا علشان بتصحي من النجمة. تنزلي تروحي شغلك ويكون هو مش بيتصل بك غير متأخر قوي بعد ما يكون هو روح من شغله. بس برضه بتفضلي صاحية. بتستني المكالمة بتاعته عشان  تحسسيه ان انتي مهتمة به وان هو له اولوية في حياتك.

المهم يعني في الاخر ان بالنسبة للراجل وبالنسبة للبنت الاتنين بييجوا على نفسهم علشان يصوروا لبعض ان هم الشخص المثالي للتاني.

فالنتيجة في الاخر هي ان احنا في الاخر بيكون عندنا نص اتنين منبهرين ببعض . نص احمد منبهر بنص ياسمين. وهم الاتنين عندهم اعتقاد ان النص هو شخصيتهم المتكاملة. فنص احمد بيحب نص ياسمين جدا. ونص ياسمين بيحب نص احمد جدا. بس اللي ما حدش فيهم بيكون واخد باله منه ان نص احمد التاني ونص ياسمين التاني الاتنين لسه ما اتعرفوش على بعض. اتنين اغراب. وهنا نيجي للمرحلة اللي بعدها.

المرحلة الثانية هيه نهاية البدايات في العلاقات.

بعد ما نص احمد ونص ياسمين ينبهروا ببعض الاتنين ممكن يرتبطوا او يتخطبوا واحيانا كمان بيتجوزوا. بيعيشوا مع بعض تحت سقف بيت واحد وبيناموا في نفس السرير. بس ولا واحد فيهم بيكون دريان ان هو مش عارف الشخص اللي نايم جنبه بنسبة مية في المية. ايه اللي بيحصل بقى؟

ازاي تنجح في علاقاتك العاطفية 

ليه بينفصلوا عن بعض ؟ من جانب الراجل .

لان الخمسين في المية السلبية بتبتدي تظهر فجأة احمد هيتحول ويقول لياسمين لا يا حبيبتي ما عندناش بنات تشتغل انت هتقعدي في البيت وانا هابقى راجل في بيتي احنا داخلين على جواز . تقوم هي قايلة ليه لأ ده مستقبلي انت على طول برة وانا لوحدي الشغل بيخليني وبيعوضني عن فراقك.

ولو كانوا اتنين مخطوبين لسة مش عايشين مع بعض ممكن احمد يبتدي مع الوقت كده لعاداته القديمة. بدل ما ينزل يقعد معها في الكافيه كل يوم مرة كده . فجأة هيقول لها لا انا النهاردة مطبق في المكتب عشان عندي شغل كتير. هو مش بيكون بيكذب عليها بس برضه مش هو ده الشخص اللي هي اتعرفت عليه في الاول.

ممكن برضو يرجع لصحابه وقعدة القهوة يوحشوه فيقول لها لا انا مش نازل النهاردة انا هروح اشوف الشباب. ده ممكن انطباع ان هو اتغير معها. بس كل ما في الموضوع ان هو اصحابه وحشوه وانه رايح يقعد معهم عادي يعني.

وبرضو ممكن في بداية العلاقة لما كانت هي تتصل به كان هو يسيب اللي وراه واللي قدامه عشان يتكلم معها تلاتين سانية بيسمع صوتها بس على التليفون. لحد ما فجأة في مرة كده هو يرد على التليفون ويقول لها معلش يا حبيبتي هكلمك بعدين عشان انا في ميتنج او اجتماع . في حاجة طيب ما فيش طيب خلاص آآ نص ساعة كده وهاكلمك تاني اوكي? وطبعا مش بيرجع يكلمها غير بعدها تلاته او اربع ساعات.

كل دي حاجات هتحسسها ان هو اتغير معها. مع ان هو ولا اتغير ولا حاجة هو خد راحته بس ان هو يظهر الخمسين في المية التانية من شخصيته وده مش بيعجبها.

ليه بينفصلوا عن بعض ؟ من جانب البنت .

البنت برضه هتعمل نفس الكلام. هتبتدي تظهر غيرتها من زميلته او من السكرتيرة بتاعته وهتنكد عليه عيشته مع ان هي عارفة كويس قوي ان هو مش هيقدر يعمل حاجة وان ما فيش حاجة اساسا.

هتبتدي تقول له لأ انا مش خارجة النهاردة لان انا رايحة البيت لصاحبتي ولا رايحة عند ماما. فهو هيبتدي يقول لنفسه. هي مش ماما دي اللي انتي كنت بتهربي منها علشان تتكلمي معايا خمس دقايق بالظبط على التليفون. لا ده ياسمين اتغيرت قوي معايا.

هي لا اتغيرت ولا حاجة. هي بمنتهى البساطة فعلا رايحة عند مامتها. ولكن بما ان هو ما شافش الجانب ده من شخصيتها ابدا. فهو بيبتدي يحس ان هو خلاص ما بقاش اولوية زي الاول.

طبعا الأمثلة كتير وانا لو فتحت فيهم مش هنخلص. المهم ان الاتنين بيبتدوا يحسوا ان هم بيتعاملوا مع شخص غير اللي هم اتعرفوا بس دي مش حقيقة.

هم بس بيبتدوا يتعرفوا على النص التاني او الجانب التاني من شخصيتهم. بيبتدوا يتعرفوا على الجزء الوحش اللي في الشخص التاني. الجزء اللي الشخص التاني كان بيداريه في بداية العلاقة بحيث ان هو يصور للشخص التاني ان هو انسان مثالي بحيث يبهره.

الاتنين بيلاقوا ان المشاكل كتير وان الاختلافات اكتر مش شبه بعض زي ما كانوا معتقدين. فبيبتدوا يتضايقوا من بعض والموضوع بيبتدي يمشي في المسار اللي يخلي العلاقة تنتهي.

ايه هو اللي انت تقدر تطبقه في حياتك الشخصية علشان ما تقعش في السيناريو ده? هقول لك على كم نقطة كده. الكلام موجه للولاد وللبنات.

• النقطة الاولى هي ان انت ما تستعجلش. افهم ان اي شخص انت انجزبت له ولقيته كمان منجزب لك فهو له جانب اخر من شخصيته. انت لسة ما تعرفوش ولسه مش هتشوفه دلوقتي. وده طبيعي جدا لان العادي هو ان انت لما بتكون عايز تبهر حد بتبالغ في صفاتك الحلوة وبتداري تماما عن صفاتك السلبية مع ان انت مش بيكون قصدك خالص. الكدب او الخداع او النفاق. الشخص اللي قدامك ما بيتغيرش. انت بس الوقت كده بتبتدي تلاحظ الخمسين في المية اللي انت ما كنتش شايفها في الاول.

• النقطة الثانية هي ان انت ما تداريش على عيوبك بنية ان انت تبهر الشخص اللي قدامك وتصور له ان انت شخص مثالي. اللي عايزك ياخدك زي ما انت كده بحلوك وبوحشك ما تغيرش نفسك عشان حد. غير كده للاسف هتخسروا بعض. وفي نفس الوقت ما تحاولش تغير الشخص اللي قدامك لان الطبع بيغلب التتبع. لو عايز الشخص اللي قدامك يبقى تاخده زي ما هو بحلوه وبوحشه. ما فيش حاجة اسمها مع الوقت هربيها على ايدي وما فيش حاجة اسمها مع الوقت هخليه يتغير.

• النقطة الثالثة هي ان انت لازم تكون مدرك ان انت كمان مش بتظهر غير خمسين في المية بس من شخصيتك الحقيقية لما تكون عايز تبهر اللي قدامك. فما تلومش ما تعاقبش حد على نفس الجريمة اللي انت ارتكبتها.

• النقطة الرابعة هي ان العلاقات اللي بتبتدي بسرعة بتنتهي بسرعة. والعكس صحيح. علشان كده فترة الخطوبة مهمة جدا خصوصا لجواز الصالونات. اكيد ده احسن من ان انت او انت تضطروا تكملوا حياتكم مع شخص انتم مش طايقينه لمجرد ان فيه عيال منكم. ما هو لو حصل طلاق العيال للي بيتلطوا في الموضوع وهم اللي بيتظلموا. فاختار الشخص اللي انت عايز تكمل معه بقية حياتك كويس قوي. ما تتسرعش في الحكم على الشخص اللي قدامك مهما كنت منبهر به وعندك اعتقاد ان هو ملاك نازل من السما.

• النقطة الخامسة هي ان ما فيش ملايكة. كلنا بني ادمين. فينا الحلو وفينا الوحش? لو بصيت للوحش بس ساعتها تبقي متكبر. ولو بصيت للحلو بس ساعتها تبقى مغفل. كده كده هتعاني في علاقتك وهتلاقي ان فيها مشاكل. فاختار الشخص اللي انت مستعد تستحمله وتحل مشاكلك معه واختار الشخص ده كويس قوي. كده كده هتعاني بس مش هو ده المهم. المهم انت هتعاني في سبيل ايه وعلشان خاطر مين? اختار الشخص ده بميز وبعيوبه. خده زي ما هو كده فول باكيدج. مش هينفع تاخد خمسين في المية بس منه.

اتمنى يكون المقال ده عجبكم. لو عايزين مقالات اكتر من النوعية دي عرفوني تحت في الكومنتات. يا رب ربنا يرزقكم سعادة اضعاف اللي تتمنوها. وبكده يكون خلص المقال النهاردة اشوفكم ان شاء الله قريب . توتة توتة خلصت الحدوتة Mohamed Ashraf . سلام عليكم.